إلا الهوى ما بينفعو غيار الهوا
يعقوب ابراهيم وهبي
إلا الهوى ما بينفعو غيار الهوا
عاشق انا.. من هيك كاويني الجوى
وداب جسمي وما بقا منو نوى
من الأمل ضليت عم اشحد قوى
تا التقي بمحبوبتي ونقعد سوا
ونسر اللي كان الجو يعقدلو لوا
ترنح ومن قبة الزرقا هوى
رحت الطبيب ومقصدي لاقي دوا
فرفك جبينو وقال بالخبره الحوى
شوف يبني: ماشفت عندك سوى
جسم صاغ وقلب عم يخفق هوى
قيس قبلك جن حيثو ما ارتوى
من حب ليلى في عهد ماضي انطوى
ولا حب مي وهند وبنات الغوى
طفو لهيب النار في قلب اكتوى
وحيث حبك زاد عن هالمستوى
ما بنصحك من جهتي “تغير مناخ”
إلا الهوى ما بينفعو غيار الهوا
